Vergi Məcəlləsinə edilən dəyişikliklərə əsasən, texnopark fəaliyyəti ilə bağlı bir sıra gəlir, dividend, əmlak və torpaq vergisi güzəştləri 20 il müddətinə tətbiq olunacaq. Bu güzəştlər texnopark ərazisindən kənarda fəaliyyət göstərən rezidentləri də əhatə edir. Fərdi sahibkar rezidentlərin texnopark fəaliyyəti üzrə gəlirləri isə rezidentlik şəhadətnaməsinin alındığı tarixdən 20 il müddətinə vergidən azad ediləcək.
Texnopark rezidentlərinin fəaliyyəti üzrə çalışan işçilərin aylıq əmək gəlirlərinə də 2027-ci il yanvarın 1-dən başlayaraq 20 il müddətinə 0 faiz gəlir vergisi tətbiqi nəzərdə tutulur. İri sahibkarlıq subyektləri bu güzəştdən yalnız əlavə tələblərə əməl etdikdə yararlana biləcəklər: ixrac gəlirlərinin ümumi gəlirdə minimum payı səlahiyyətli qurum tərəfindən müəyyən ediləcək, ixracdan əldə olunan vəsait isə Azərbaycandakı bank və ya digər ödəniş hesablarına daxil olmalıdır.
Dəyişikliklər tədqiqat və təcrübə-konstruktor işlərinə çəkilən xərclər üçün də vergi stimulu müəyyən edir. İnnovasiya məhsullarının yaradılması ilə bağlı, nağdsız qaydada ödənilən və əsas vəsaitlərin, eləcə də qeyri-maddi aktivlərin alınmasına aid olmayan xərclər 10 il müddətində 2,5 əmsalla gəlirdən çıxıla biləcək. Qarşılıqlı asılı şəxslər arasında çəkilən xərclərə bu əmsal tətbiq edilməyəcək. Xərclərin əhatə dairəsi və güzəştdən istifadə qaydası ayrıca müəyyənləşdiriləcək.
Rezidentlərin öz fəaliyyəti üçün xarici provayderlərdən aldıqları bulud, infrastruktur, platforma, proqram təminatı və API xidmətlərinə görə ödənişlərə 20 illik ƏDV azadolması nəzərdə tutulub. Xidməti sonradan başqa müştərilərə satan şəxslər bu azadolmadan yararlana bilməyəcəklər.
2027-ci il yanvarın 1-dək verilmiş rezidentlik şəhadətnamələri qüvvədə qalacaq. Mövcud rezidentlər yeni rejimdə nəzərdə tutulan güzəştlərdən istifadə etmək istədikdə yenilənmiş qaydada müraciət edərək yeni şəhadətnamə almalıdırlar.
Mənbələr: Vergi Məcəlləsinə dəyişikliklər haqqında Qanun, Texnologiyalar parkı haqqında Əsasnaməyə dəyişiklik.